انا خلاص داخل الجيش فى دفعه يناير فكنت عايز اعرف ايه المسموح اللى اقدر اخده معايا من الاكل والادوات الشخصيه واللبس وكده يعنى انا مش عارف اعمل ايه لو حد يقدر يساعدنى اعرف اخد ايه معايا من غير مايخدوه منى
عرض للطباعة
انا خلاص داخل الجيش فى دفعه يناير فكنت عايز اعرف ايه المسموح اللى اقدر اخده معايا من الاكل والادوات الشخصيه واللبس وكده يعنى انا مش عارف اعمل ايه لو حد يقدر يساعدنى اعرف اخد ايه معايا من غير مايخدوه منى
على ما أعتقد حسب ما كنت متذكر
جميع أدوات النظافة الشخصية متاحة (معجون أسنان-معجون حلاقة-مزيل رائحة العرق - بودرة تلك أو بودرة صبار لإزالة رائحة القدمين-ماكينة حلاقة و أنصحك بالنوع الذى يحلق على الناشف و ذلك لربما لا يتوفر الماء أو يكون بالكاد شحيح يكفى الشرب فقط) ماكينة الحلاقة لورد أفضل فى الحلاقة على الناشف
ملابسك الداخلية لا تكون ملونة و إنما لون أبيض قطن (بوكسر )
و حيث أنك داخل فى الشتاء فيجب أن تحتاط للبرد بملابس داخلية صوف بأكمام طويلة للفانلات و أخرى بأرجل طويلة
و لكن نصيحة لا تلبسها على اللحم مباشرة و لكن فوق الملابس القطنية حتى تتفادى التعرض للبرد ذا ضطررت لتغييرها فى الهواء العادى
إحطات بتوفير إبرة خياطة و خيط كاكى و خيط أبيض -حتما سوف تحتاجها لخياطة ما يتمزق من ملابس خلال التدريبات .
لتلافى قلة الغذاء أو ردائته حتى أن تعتاد عليه أنصح بتوفر كمية لا بأس بها من التمر أو العجوة لآنها تعطيك إحساس بالشبع و كذلك المزيد من الطاقة .
ملجوظة : هذا ما كنت أحتاط له عندما خدمت فى السبعينات
عندما ينزل إبنى أجازة من الجيش سوف أوافيك بالمستجدات
مهم جدا أن يكون معك راديو ترانزستور للموجة العادية أو الموجات القصيرة - موجة ال fm لا تلتقط فى كل الأماكن و كذلك عدد كافى من الحجارة للراديو - حيث أنه سوف يكون الوسيلة الوحيدة لمعرفة ما يدور من الأحداث - لاحظ أن الموبايل ممنوع .
كارت تليفون منزلى مرحبا حتى تتصل بزويك إذا سنحت الفرصة من حط أرضى .
عدد إثنين قفل واحد كبير للمخله و أخر صغير سوف تحتاجه فيما بعد إذا تم تسكينكم فى عنابر
مفتاح القفل الإحتياطى يكون طرف زميل لك تثق فبه و لا تنسى أن تأخذه منه قبل كل ترحيل لأنك لن تبقى فى مكان واحد طوال فترة تجنيدك
الف شكر بس واحد صحابى بيقولى ممكن تاخد معاك معلبات مش عارف بقى ايه النظام
إنسى المعلبات .. عشان هياخدوها منك وهم بيفتشوا شنطتك.
ونصيحة لما تروح متروحش وانت لابس هدوم كويسة(عزيزة عليك يعني)
عشان غالبا بيكون في حفل إستقبال للعساكر المستجدين وهم لابسين ملكي. بعد معرفة رقمك ورقم السرية.
(حفل الإستقبال لو عايز تعرفه : للسرية كلها ..إجري.. قف .. ارقد .. إيديك ورا ظهرك.. إزحف) وهكذا.
خد معاك فلوس .. عشان لو التعيينات مش كويسة هتعيش عالكانتين يا معلم.
ومتنساش الاقفال ومكن الحلاقة والمعجون والصابون ومزيل عرق والإبرة والخيط والقصافة وبودرة إيفا بتاعة رائحة الجزم(لإنك هتلبس البيادة من 5 صباحا إلى 9 مساءا).ومهم جدا تاخد معاك دواء للبرد (إوعى تنسى).
البرنامج اليومي في مركز التدريب:
1-إصحى بدري شوية (لأ شويتين) عشان تدخل الحمام براحتك وتحلق دقنك براحتك وتغسل سنانك قبل الجماهير الغفيرة، ومتنساش تتوضأ.
تخيل 100 عسكري بيحلقوا دقنهم في 7 احواض ب7 مرايات .. وبيتحبكوا انهم ييجوا في وقت واحد من 4.30 إلي 5.10
2-في تمام ال 5.20 بيكون الجميع واقف أمام السرية ولابسين الأفرول .. طابور التمام وبينادوا بالأرقام (متنساش رقمك)
3- السرية كلها بتروح (الميز) عشان الفطار .
4- العساكر كلها بترجع للعنبر عشان تلبس الرياضي.
5-مركز التدريب بالكامل يروح لأرض الطابور عشان تحية العلم وتمارين الصباح الساعة 7.
6-بتكون خلاص هلكت . فتاخد ساعة راحة(لو قولت break ممكن يفتكروها شتيمة) من 9 إلى 10
بتروح الكانتين وتظبط نفسك ، وتروح العنبر تلبس الأفرول تاني.
7-تجمع في أرض الطابور الساعة 10(10.05 مينفعش .. إنت في جيش يا حبيبي)
8-طابور تمام تاني ..
9- كل صول يمسك السرية بتاعته وتدريبات على الخطوة العسكرية لحد ما رجلك تورم وحركات السلاح (حركات عرض فقط)
تقعد تخبط عالسلاح بإيديك لحد ما تورم إستعدادا ليوم العرض العسكري اللي هيحضره القائد أو رئيس الأركان.
10- الساعة 2 يرحموكوا .. تروحوا تسلموا السلاح في السلاحليك(مخزن السلاح يعني) وبعدين 2.30 تجمع عشان الغدا أمام الميز
11- بعد الغدا ممكن يسيبوكوا شوية بردوا .. لحد الساعة 7 مساءا
12- الساعة 7 طابور تمام تاني في ارض الطابور .. و تحية العلم
13-بعد كده تروح السيما (أيوه السيما ... وإجباري كمان) يوميا نص جنيه غصب عنك .. تدفعه وبعد كده إطلع منها أحسنلك وحفاظا على صحتك.
دخلتها مرة وبس على كده .. (عبارة عن 3 أو 4 تلفزيونات متدلية من السقف ومشغلين روتانا سينما)
بس مش بتقدر تشوف حاجة (من كتر الضباب الناجم عن حرق الرئة البشرية بالسجااااااااااااير)
وياسلام عالأخوة اللي مسطحين وخالعين البيادة (متخيل معايا سجاير على شرابات معفنة ... compromise رهيب)
لأ وإيه .. إنتا رايح في الشتا .. يعني منين متروح كانتين أو سيما أو راحة .. هتلاقي الجميع قاعد بيولع في صدره .
دانا كنت بشوف ناس بتولع السيجارة التانية قبل مالأولى تخلص.
14- 8.30 ده وقت التجمع امام الميز عشان العشا.
15- 9 أو 9.30 طابور تمام أمام العنبر وتطلع تغير وتنام
بالنسبة لأكل الميز (التعيينات):
1- الفطار والعشاء : بيكون جبنة وفول - أو حلاوة وعدس -ورغيف عيش(جراية) وشاي .. وأحيانا مربى بدل الحلاوة.
ملحوظة خاصة: الشاي بيكون محطوط فيه نسبة من زيت كافور
الزيت اللي معمول بيه الفول بيكون فيه نسبة 8 % زيت كافور في إزازة الزيت الواحدة -ومكتوب
عالإزازة خاص بالقوات المسلحة أو أماكن التجمعات الطلابية زي المدن الجامعية.
2- الغداء : بيكون (رز أو مكرونة)+(سبانخ أو فاصوليا أو لوبيا)+(سلطة)+(مرتين في السبوع لحم أو فراخ)
بالنسبة للكانتين:
كان موجود باستمرار سندوتشات فول وطعمية ورومي ولانشون وجبنة طعمة وأحيانا برجر
وكان في سردين أو تونة وبسكويتات انواع كتير وحاجات ساقعة و باتيه ودنش و شاي وطبعا سجاااااااير.
وكمان موجود مكن حلاقة وصابون
بالنسبة للخدمات:
بيتم توزيع العساكر عالخدمات بالتساوي .. بحيث النص متوزع خدمة والنص التاني مريح.(10 ايام في خدمة و10 free )
نوعية الخدمات:
1- نضافة عنبر (بيغسلوا العنبر يوميا صباحا ويمسحوه)
2- نضافة شوارع (شارع أ شارع ب .....)
3- نضافة حمامات (وده مش عيب .. زي ما بتستخدم الحمام مطلوب منك تنضفه)
4- خدمة مطبخ (بتتعامل مع الخضار والبطاطس والسبانخ وحلل كبيرة جدا وغلايات ومسح وتنضيف)
5- خدمة ميس ( توزيع السرافيس وكبايات الشاي وغسلهم ومسح وتنضيف الميس بعد كل وجبة .. وبالتالي دي أسوأ خدمة)
6- خدمةكانتين ... ودول الكوسة يا باشا .. عشان مبيتسحلوش معانا في أرض الطابور والخطوة العسكرية وطوابير العرض العسكري بالسلاح.
تحذيرات:
1- فلوسك .. شرفك .. مهماتك (لما تروح هناك هتسمعها كتير) (وكمان هتسمع دي: وانت هنا مصير مش مخير .. الجيش بيقولك إتصرف)
2- طبعا أدواتك بتاعتك إنت بس (مش محتاج أقولك مكن الحلاقة والفرشة و..و..و..) وكمان الصابونة بتاعتك محدش يستعملها غيرك.
3- برضو القصافة .. حذاري (بتنقل فطريات وبكتيريا وأمراض دم والعياذ بالله)
4- تاني مرة أقولك على دوا البرد (هتحتاجه جدا هناك)
5- تجنب الأماكن المغلقة .. زي السيما (كتر الدخان بتاع الجاير فعلا مؤذي كتيييير
6- بالمناسبة .. هييجوا في يوم ما يديكوا حقنتين (1 سنتيمتر مكعب في الدراع اليمين .. و زيه في الدراع الشمال) .. وهتاخدوا بعدها يوم أو اتنين بدون تدريبات رياضية وسحل في أرض الطابور.
لان الحقنتين دول واحدة فيهم بتهد الجسم جدا جدا .. وبتسبب تورم ووجع شديد في مكان ماخدتها. وبتسبب سخونية.
(متسمحش لنفسك انك تسخن بزيادة )إغسل إيدك وردراعك ووشك أو روح إتوضا أو استحمى
بعض الناس من فرط السخونية كان يغمى عليهم.
7- خد الدنيا هناك بسهولة.. (متعصلجش) .. ومتضايقش نفسك من صول أقل منك علميا أو ظابط واخد قلم في نفسه ..
....لكن لو حسيت بتعب جامد أو ألم شديد(ربنا يحفظك ويبعد عنك كل سوء) يعني (مثلا ألم شديد في الضهر أثناء الجري) متدوسش على نفسك .. محدش هينفعك لو حصللك حاجة.....
.... خليك ذكي ومتجهدش نفسك جامد .. يعني(حاول تنظم تنفسك أثناء الجري .. وأثناء الخطوة العسكرية متدبش رجلك جامد في الأرض .. إيه مبتعرفش تمثل!!)....
8- متنساش الصلاة .. حتى ولو عالأسفلت .. ولو بتيمم ... (هتعينك وتريحك من البيحصل فيك)
-مركز التدريب : 45 يوم إلى 50 يوم في أغلب الأحوال .. ينتهي بيوم العرض العسكري
-بعده بتنزل أجازة .. في الغالب إسبوع .. وترجع .. فيتم التوزيع على الوحدات ويأتي مندوب من الوحدة بتاعتك عشان ياخدك مع بعض العساكر المستجدة
-متتوقعش انك في الوحدة الجديدة هيريحوك .. لأ ، هيخنقوا عليكم شوية في الأول عشان مستجدين.. بس ولا حاجة مقارنة مع مركز التدريب.
وده حال الدنيا كلها (حتى لو في شغل .. طالما جديد .. يبقى كل من هب ودب يتنطط عليك) لحد ما تفرض شخصيتك واحترامك لنفسك ولغيرك فبالتالي يحترموك ويقدروك ... وانت وشطارتك !!!
-مركز التدريب بيكون ليه ذكريات لا تنسى وأصدقااااااااء أكتر من الإخوات.
وربنا يوفقك وتعدي جيشك على خير ... امين يارب.
أخوك في الله
أحمد حواس
"جندي مجند أركان حرب"
جندى احمد حواس انت ايه الوصف الدقيق ده انت رجعتنا لايام الجيش انا بطنى وجعتنى ياراجل بس ياشباب اعتبر نفسك فى معسكر تدريبى بمزاجك هتعدى وخلاص هقولك موقف حصل فى مركز التدريب كان المركز فيران وكان اللى يمسك 5 فيران ينزل اجازة وكان معانا واحد متجوز اسمه الشيج رمضان المهم هو مسك ثلاثه بس وكنا نفسنا ينزل انا لفيت على العنابر واشتريت له فارين الفار ب جنيه ونزل اجازة ----
الله يطمنك متابععععععععععععععععععععع ععععععععععععععععععععععععع ععععععععععععععععع
لانى جيشى كمان 30 يوم
ماهو ياحمادة الجنيه ده كان سنه 93 يعنى عشرين سنه اهو يعنى كان الجنيه بيجيب طبق كشرى مثلا
1993 ....... كان الجنيه يجيب 3 قزايز بيبسي !!!!!!! او اربع سندوتشات فول و طعمية بس وصاية ..... و كان الدولار بتلاتة جنيه و ربع !!!!!!
ربنا يقويك يا زعيم !!
الي أعرفه ان المؤهلات بيدخلوا في 15 يناير أو بعدها بيومين أو تلاتة.
وبعدين الجيش إصلاح ليك يا ميني كوبر .. عشان تبطل تلبس المارد الكوري(واخدلي بالك):36_2_33:
ههههه ... بهزر طبعا!!!
يااااااااه .. 92
ياباشا ده الفيران غليت قوي دلوقتي.
الحمد لله اني نفدت منه بمعجزه مع اني اسمي كان خلاص نزل في كلية الظباط الأحتياط
نفدت ازاى يا سعد باشا
واسطه يامعلم مع كشف هيئه عشان والدي كان مريض وانا الكبيرو اخويا اصغير مني ب 16 سنه
شكر خاص للعضو احمد حواس
انا معاك يامينى كوبر 18/1 من الرمايه
يارب هون عليا الايام
هو ممكن اخد معايا بوكسرات ملونه اللى هيا قطونيل ولا انزل اشرى ابيض وخلاص
كنت عايز اعرف فين اماكن بيع مستلزمات الجيش علشان لو حاجه اتسرقت او ضاعت وهل ممكن اخد معايا فتيامنات لتقويه الجسم
بالنسه للنظافه الحمامات انا ممكن ارتكب جنايه او جنحه مش عارف ممكن انظفها غصب عنى
سبحان الله انا غير مدخن لو كنت مدخن مكنتش اتضايقت انا بكره السجاير كره العمى
انا لازم اشترى ساعه فيها منبه علشان اصحلهوم من النجمه المشكله ان انا بحب انا بمزاجى واصحى بمزاجى مش عارف مزاجاى كده هيتعجنن
خدوا معاكم (مزيل عرق بلية (بلاش إسبراي ممكن يتاخد) + 3 فرش جزم على مقاسك (مهم جدا) + بدرة رجل + 3 شرابات ميري من عند الشيشينجي (هتحتاجهم جدا) + البوكسرات ممكن تكون ألوان (ويُفضل) + مكن حلاقة ومستلزماتة + صابونة ديتول + صبانة (مهمة علشان الصابونة متضيعشي)+ 3 أقفال يكون فيهم 2 بالكمبيوتر(علشان الصيني بيفتح بعضة ) + كروت ميناتل + معلقة + ابرة وخيط + كشاف نور صغير + بلاش تاخد معاك أكل علشان مش هيرضوا يدخلوة + حاولوا تدخلوا معاكم علبة تمر ، هتفيدكم جدا جدا جوة + حاولوا تهربوا الدوا بتاع البرد ، علشان لو شافوة هياخدوة ويقولولك لما تتعب روح للدكتور ومش هيديكم حاجة)
أنا كمان كشفت هيئة ، وكان معي إلتماس إني أنزل من ظابط إحتياط إلى عسكري ، وقد كان والحمد لله.
-بالنسبة للبوكسرات الملونة .. مكانش في قيود عالموضوع ده.
-متشغلش دماغك دلوقتي بأماكن بيع المهمات (الهدوم الميري يعني) .. مش وقته خالص.
حافظ على مخلتك .. ومتفكرش في يوم تسليم مختلك دلوقتي خالص.
-بالنسبة للفيتامينات ..أعتقد مش هيسمحوا ،، أنا سمحولي بدوا البرد بالعافية.
-بصراحة عمري ما اتحطيت في نضافة الحمامات (بس متقلقش.. في أدوات للموضوع ده)
أنا وبكل فخر .. نضافة ميس ثم نضافة أحد الشوارع.
-أكتر شيءضايقني أنا كمان دخان السجاير .. أنا عندي أقعد في عز البرد ولا إني أقعد في مكان دافي ومغلق ومعبي دخان.
-بالنسبة لمزاج سيادتك : فانا مش عارف أقولك إيه بصراحة .. "يمهل ولا يهمل"":36_2_49[1]:
انا جندي مجند بكل فخر متخلف عن اداء الخدمة العسكرية وربنا يستر
معاكم يوم 19 :( وربنا يستر ع الايام الي داخليين عليها ..
دي بعض النصائح المنقولة برضوا
--------------
على العموم الحاجت المهمة فى مركز التدريب.........
1- فلوس تقريبا من 300 وانت طالع
2-غيارات داخلية
3-بودرة رجلين
4-مزيل عرق
5- 3 اربطة جذمة
6-فرش جذمة عشان خاطر البييادة ناشفة اوى
7-قفلين نحاس عشان المخلة والدولاب
8-هيسلموك فوطة هناك بس ابقى خد واحدة تانية معاك
9-امواس كتير عشان هتحلق ذقك كل يوم او يومين ولو ذقنك بتلتهب خد معاك اى كولونيا
10-ادوية الانفلونزا و مسكنات
11-معلقة
12-فرشاة اسنان لو بتسخدمها
13-ورنيش اسود
14- خرطوم صغير يجى متر هتعرف جوه هتعمل بيه ايه
15-ليفة عشان تستحمه
نصائح......متعرفش اى حد معاك فلوس كام عشان السرقة و حافظ على مخلتك و حطها فى عينيك عشان هتسلمها بعد المدة يا حبيبى
مكدبش عليك الحياة هناك صعبة حبتين بس كل يوم هيعدى اليوم اللى بعديه اسهل عشان انت هتاخد على الوضع .......انسى البرستيج و اعرف ان ده اكتر وقت هتعرف فيه ربنا و فى نفس الوقت عندك فرصة للبوظان وانت اللى هتختار ......متخفش من حد و متخليش حد من الصولات ياخد عليك .....الميرى مفيهوش شتيمة ليك و لاهلك فمتسمحش لحد يشتمك و ربنا يوفقك "فترة من الحياة جميلة جدا وافضل صحاب هتعرفهم هناك لانكم قايمين نايمين و متكدرين مع بعض افضل حتى من كل اصحابك اللى انت تعرفهم" ربنا يوفقك
وانا هانزل رمسيس بيقولوا بيبيعوا الحاجات بتاعة الجيش .. انا هنزل علي اول السنة ان شاء الله ,, واجيب الاقفال الكمبيوتر دي ..
بالنسبة للأدوية حاول تأخد معاك دواء للإسهال و أخر للإمساك و لكن خبيهم بأى شكل
حاول يوم ذهابك لمركز التدريب أن تضع إحتياجاتك الشخصية فى أقدم شنطة عندك و تلبس
أقدم ملابس عندك لأنك يوم الترحيل للوحدات و فور إستقبالك سوف يتم حرق تلك الشنطة و
الملابس المدنى أمام عينيك لأنهم ليسوا ملابس ميرى
الملاحظات المكتوبة كلها تنصب على فترة مركز التدريب فقط و لكن بعد الترحيل فى الوحدات
سوف تعتبر فترة التدريب إقامة فى فندق 5 نجوم خاصة ذا تم توزيعك فى أماكن صحراوية يصعب
فيها الحصول على الماء لذلك لا بد أن تحتاط بالحصول على بكرتين أو ثلاثة من ورق التواليت
تجنب إستخدام لغة غير اللغة العربية حتى لا تصبح عرضة للإضطهاد من بعض الشخصيات المعقدة
بعد فترة التدريب و الحصول على أجازة لتقييف الأوفرول على مقاس جسمك حاول تفصل أوفرول
جديد لدى الشيشنجى أو ما شابه فى محلات العباسية لأنه سيفرق معك كثيرا فى إكتساب إحترام
قادتك لك فى الوحدة التى ستخدم فيها بعد التوزيع
تجنب تسليف نقود لأى زميل خلال فترة التدريب إلا ذا كنت تعرفه من قبل
لا تنسى بعد التوزيع فى الوحدات أن يكون معك سماعة للراديو حتى تستطيع سماعه طوال فترة
الخدمة الليلية و أنت واقف وحدك بالسلاح و لكن ضع السماعة فى أذن واحدة فقط لكى تسمع
بالأخرى ما يدور حولك من محاولة مفاجئتك
للتفتيش عليك
اية ده بجد بيحرقوا الهدوم ؟
مفيش حرق هدوم ولا حاجه ، ومفيش كمان حفلات إستقبال ، أساسا مركز التدريب بقى 15 يوم ، هدومك الملكي هيخلوك تسلمها لأهلك فى أول زيارة ، ولو أهلك مجوش هتخليهم فى الدولاب وترجعهم لما تنزل أول أجازة
بس ممنوع الأكل (علشان ميضمنوش أن ممكن يجيلك تسمم بسببة - على أساس إن مش هيجيلك تسسم من أكل الميز :d )
صحيح خدوا معاكم بخاخة وديتول سائل (علشان ترش على السرير علشان البق ) ، ومتنسوش الشبشب (هتستلم هناك شبشب بس بيعور الرجل ) ، وبجد الأيام بتعدي عادي المهم متعملشي فيها الواد البُرم وتتنطط على حد ، ولا تعمل نفسك الزعيم ، خليك عادي أعمل اللى يتطلب منك ومتخليش حد ملوش لازمة يكلمك كلمة ملهاش لازمة ، وأعرف إنك بتأدي خدمة وطنية مش محبوس ، بجد هتفرق معاك كتير
وربنا يوفقكم ويعديهالكم على خير
أخوكم جندي مُجند مصطفى محمود ، رديف 1 / 6 / 2012
شكرا يا مصطفي محمود :)
انا جبت معالق بلاستك كدا علشان الاكل ..
اجمد حاجة موضوع المعالق البلاستك ده ، تاكل وتسيبها ، ولو حد من زمايلك نسي يبقى معاك معلقة لية
ايوا ههههههه انا جبت بتاعة الحفلات ,, بس يارب يوافقوا انها تدخل ؟
كمان كمان انا عمال اكتب فى ورقه اهو معن عندى لجنه طبيه عليا يوم الاربعاء بس انا موهل نفسيا لدخول الجيش جدااااااااااااا
حد طلبو منو صوره الرخصه ؟
لاء مطالبوش صور رخصة حتي لو طالبوا ماعنديش او مش بعرف اسوق وش هههههههه
ههههههههههههههههه
دول نصحين بس لو سلاحك مدرعات مجنزره هتسوق ياعنى هتسوق هههههههههههه
ربنا يستر بقي :)
هههههههههههههههههه دى بيقولو سواقه المدرعات و الدبابات ايه تحفه هههههههههههه و لا الكسحات بقا اوعا تدخل معاك رخصه خاصه تخرج معاك رخصه درجه اولى هههههههههههه
واضح ان ال "م/مصطفى" كان حظه حلو في مركز التدريب بتاعه (مفيش حفل إستقبال + 15 يوم ..بس).
بالنسبة للهدوم الملكي : المفروض تسلمهم للأهل في أول زيارة، أو تروحهم في أول أجازة.
وخلي بالك : الشرطة العسكرية ليها الحق تفتشك وتفتش شنطتك وانت نازل أجازة من مركز التدريب طالما لابس ميري.
فلو معاك هدوم ملكي : المفروض ليها تصريح.
أنا مركز التدريب بتاعي كان 50 يوم ، والهدوم الميري فضلت معايا لحد ما خلصت الفترة كلها.
وأكيد كل مركز تدريب وله نظامه.
ربنا معاك